महाराष्ट्र लोकसेवा आयोगामार्फत (MPSC) मे २०२६ मध्ये आयोजित करण्यात आलेल्या तीन मुख्य परीक्षांचे वेळापत्रक आणि महत्त्वाच्या सूचना जाहीर करण्यात आल्या आहेत. महाराष्ट्र विद्युत अभियांत्रिकी सेवा मुख्य परीक्षा – २०२५ आणि महाराष्ट्र स्थापत्य अभियांत्रिकी सेवा मुख्य परीक्षा – २०२५ या दोन्ही परीक्षा शनिवार, दिनांक १६ मे, २०२६ रोजी आयोजित केल्या आहेत, तर महाराष्ट्र गट-ब अराजपत्रित सेवा मुख्य परीक्षा – २०२५ ही परीक्षा रविवार, दिनांक १७ मे, २०२६ रोजी पार पडेल.

या तिन्ही परीक्षांसाठी उमेदवारांनी आपले प्रवेश प्रमाणपत्र आयोगाच्या https://mpsconline.gov.in या अधिकृत संकेतस्थळावरून डाऊनलोड करून त्याची मूळ स्वरूपातील प्रिंट सोबत आणणे अनिवार्य आहे. आयोगाने वेळेच्या बाबतीत कडक सूचना दिल्या असून, उमेदवारांनी परीक्षा केंद्रावर परीक्षा सुरू होण्यापूर्वी किमान दीड तास अगोदर उपस्थित राहणे आवश्यक आहे, तसेच प्रत्यक्ष परीक्षा सुरू होण्याच्या वेळेपूर्वी एक तास अगोदर परीक्षा कक्षातील स्वतःच्या बैठक क्रमांकावर उपस्थित राहणे बंधनकारक आहे. रहदारीच्या समस्या, पाऊस किंवा इतर कोणत्याही कारणास्तव अंतिम प्रवेशाच्या विहित वेळेनंतर येणाऱ्या उमेदवारांना कोणत्याही परिस्थितीत प्रवेश दिला जाणार नाही.

तसेच, सर्व उमेदवारांनी आयोगाच्या संकेतस्थळावरील ‘Guidelines for Examination’ आणि प्रवेश प्रमाणपत्रावरील सूचनांचे काटेकोरपणे पालन करणे आवश्यक आहे; नियमांचे उल्लंघन करणाऱ्या उमेदवारांवर आयोगाच्या स्वेच्छधिकारानुसार कारवाई केली जाईल, ज्यामध्ये कायमस्वरूपी प्रतिबंध (Debar) किंवा कायदेशीर कारवाईचा समावेश असू शकतो. प्रवेश प्रमाणपत्र मिळविण्यात कोणतीही अडचण आल्यास उमेदवार contact-secretary@mpsc.gov.in किंवा support-online@mpsc.gov.in या ईमेलवर अथवा ०२२-६९१२१२१४ किंवा ७३०३८२१८२२ या दूरध्वनी क्रमांकावर संपर्क साधू शकतात.